Samhliða...marghliða tilvera.

Í svefnrofunum ferðast um land handan vökunnar, ævintýri sem erfitt getur verið að ráða í. Þar sem víða er farið, samferðafólk úr vökunni, fyrr á árum og nú í samtíðinni er oft komið í allt annað samhengi en átti / á að venjast. Eru það langanir sem koma úr djúpi sálarinnar eða kannski samhliða lifandi tilvera sem fram fer í svefni þessarar tilvistar, þeirrar tilveru sem nú er í og skrái þessar mínar hugrenningar. Er þá í hinni samhliða tilveru minni vaka þessarar, draumur hinnar. Eru kannski margir fletir, margar samhliða tilverur í gangi, er tilvera sú sem er mér nú efst í huga aðeins með sterkasta tengingu í augnablikinu! Og er yfirgef þetta tilvistarstig tekur ein hinna við, öðlast stekustu tenginguna, nú eða tekur enn á ný við nýtt ferli með eina ríkjandi vitund og margar þokukenndar er lifna í svefni nýrrar tilvistar!

Eru draumar línuleg atburðarás eða kaótísk, er hin hugsanlega margskipta tilvist í mörgum lögum í sálarlífinu. Og eru þá þær upplifanir sem hver tilvera / tilvist inniheldur púsl í sameiginlegum þroska sálarinnar.

Hugleiðingar á vertshúsi.........

Rangsælis í myrkri hugrenninga um mögulega útkomu samtals og afleiðinga þess. Viðbrögð gamalla tengsla og viðfang í skugga hins ómótstæðilega aðdráttarafls. Löngun fram um veg og til endimarka ljóslífsins í huga mér á stund hins gráa fölva febrúar.

--------------------------------------------------------------------------------

Og komandi dagur ber í sér tækifæri til nýrra upplifana í ljósi aukins skilnings á gangverki himintungla og samspili þeirra ásamt áhrifum á vorn lífsdans. Danssporin stígum við undirleik hins himneska tónverks sem kliður lifunarinnar er.

--------------------------------------------------------------------------------

Sannarlega margslungin tilvera ~ einvera í flökti kertaljósa. Á bar og músikin heldur sig til hlés í augnablikinu en trúlega er Kallíópa með nýjan tón tilbúinn er gleðin rís og andinn stígur sinn dans í kolli mínum, algáðum, bráðum munu ljósin lifna og upplýsist mitt líf.

--------------------------------------------------------------------------------

©Steinart

Forsagðar speglanir.........

Speglanir í tíma og rúmi, rúmlega þó full upplýst tilvera á örþunnum bláþræði, þráður í stærri sögu ósaminni en þó lifandi í huga, hugmyndir sem hverfast um myndir teknar á ferð og flugi um allan heim og líka heima í landsins fagra fjallasal, ætíð baðaður hinni bláu birtu landsins fagra í norðri, landi Guðs, er miklir friðarhöfðingjar munu upp rísa er réttum tíma er náð og náð vors lands mun lýsa upp heimsbyggð alla, já alla dreymir meira og minna; gull og græna skóga, hina fyrirspáðu paradís á jörðu og er ekki styttra í það en nokkurt okkar grunar þó grunar mig að margur muni af öllu afli reyna að koma í veg fyrir hverskyns breytingar í bráð og lengd. En afl hugans er mikilfenglegt í samstöðu og einingu.


©Steinart

Bænamál.

Minnist þess er var í barnaskóla (10-12 ára) að hver dagur byrjaði með því að farið var með „Faðirvorið“ áður en sest var niður til náms. Miðað við hvernig opinber stefna Reykjavíkurborgar er í þessum málum í dag mun þessi bænastund ekki vera leyfileg í dag. Og er því reyndar sammála, í dag búum við ekki lengur í jafn einsleitu samfélagi og er ég var í barnaskóla, þó kristni (Evagelíska Lúterska) sé enn okkar ríkistrú er ekki lengur ásættanlegt að boða hana innan skólakerfisins eins og gert var áður. Fólk velur í dag hvar það stendur í trúmálum og er og á að vera frjálst í því vali. Og tímabært er í ljósi breyttra aðstæðna að aðskilja ríki og kirkju.

Bannað að biðja á bæjarráðsfundum

Er þetta trúverðugt..

Samkvæmt staðhæfingum bandarískra embættismanna!!

Verður svo ekki hægt að réttlæta innrás BNA með fulltingi Nató á Sýrland með vísun í hernaðinn gegn hryðjuverkum. Að ógleymdum rökunum um frelsun fólks frá harðstjórum og færa „lýðræðið“ til hina kúguðu með því að sprengja innviði viðkomandi landa til grunna s.b. Lybíu og Írak.

Skoðum allar fréttir gaumgæfilega, kannski er þetta rétt sem fram kemur í fréttinni, en reynum að afla okkur nánari upplýsinga ef hægt er, því það er því miður of lítið af því að fréttamenn geri það.

Segja al-Qaeda bera ábyrgð í Sýrlandi

Spéhræðsla.

Það er sorglegt hversu mikil áhrif útlitsdýrkunin er farin að hafa á almenning, unglinga í þessu tilviki. Eins og mætur maður sagði; „lífstíll hinna frægu og ríku eru hin nýju trúarbrögð“. Þar á hann við kvikmynda og poppstjörnur og hinna ofurríku. Þetta fólk sem er orðið fyrirmyndir hins sauðsvarta almúga sem ekki hefur tækifæri né fjárráð til að eyða bróðurparti lífs síns í sjálfsdekur og fínerí eins og áðurnefnt frægðarfólk. En gott væri nú að við gætum verið í sátt við sjálf okkur, sál og líkama, eflaust eiga hinir frægu og ríku við sínar búksorgir að stríða rétt eins og við hin.

Dönsk ungmenni vilja ekki í sturtu

Ekki meira af slíku.

Höfum við ekki komist að því nú þegar að kjarnorkan er ekki ráðlegur kostur. Vissulega er hún ódýr í fjármunum talið, en skelfilega dýr að öllu leiti hvað varðar umhverfið og það til mjög langs tíma ef eitthvað fer úrskeiðis í kjarnorkuverinu. Og þó að ekkert fari á rangan veg í í almennum rekstri versins þá er alltaf geislavirkur úrgangur sem fellur til og verður að geyma einhversstaðar. Og það er ekki einfalt mál að koma kjarnaúrgangi fyrir. Það eru til ótal aðferðir til að framleiða rafmagn sem ekki fylgir slík áhætta, kannski ekki eins ódýr en öruggari.

Þess utan er einkennilegt að fara í smíði nýrra kjarnorkuvera í BNA en koma í veg fyrir að aðrar þjóðir framleiði rafmagn á sama hátt og jafnvel bæði beita viðskiptaþvingunum og hóta árásum á viðkomandi lönd fyrir nákvæmlega það sama.

Lærdómurinn sem líka má draga af því hvernig fór með kjarnorkuverið í Japan (Fukushima) ætti að kenna okkur að finna nýjar lausnir í orkumálum. Geislamengunin frá Fukushimaverinu hefur verið geysilega mikil og hún verður til staðar um langa tíð.

Leyfa fyrsta kjarnorkuverið frá 1978

Skiptir það máli......

Hefur þetta skip á nokkurn hátt gagnast hér síðan það kom heim frá Chile? Og maður spyr sig, mun Landhelgisgæslan hvort eð er nokkuð hafa efni á því að halda því úti. Öll starfsemi Landhelgisgæslunnar virðist orðin í skötulíki vegna fjárskorts, því spyr ég, breytir það nokkru hvort skipið er bundið við bryggju hér eða þar.

Þór frá í fjórar vikur hið minnsta

Girðingar!!

Mætti ekki ætla að gáfulegra væri fyrir Grísk stjórnvöld að nota þessa fjármuni í að rétta hag þeirra verst settu í Grikklandi, landi sem virðist á beinni leið í greiðsluþrot, sem mun þá trúlega leiða yfir landið enn meiri vandræði. Ekki held ég að nokkuð vandamál verði leyst með girðingum, hvorki þarna né annarstaðar.

Grikkir girða Tyrki úti

Ekki vilji til friðar......

Það er ekki og hefur trúlegast aldrei verið vilji Netanyahu (Zionisti) og meðreiðarsveina hans að semja frið eða á nokkurn hátt koma til móts við réttmætar kröfur Palestínumanna. Framferði stjórnvalda í Ísrael gagnvart Palestínu er og hefur frá upphafi verið óafsakanlegt. Hins vegar virðist sem yngri kynslóðir Ísraelsbúa séu ekki endilega fylgjandi eins harðri stefnu gagnvart nágrönnum sínum og þær eldri eru. Þar eins og víða er að verða vakning og meiri skilningur á því að við erum jú öll af sama meiði, bræður og systur.

Fær ekki frið við báða aðila