Samhliða.............tiveruflakk!

Flýgur um huga tær ímynd af hinni sönnu tilveru, hugsanlegri á grundvelli nýrra viðmiða á samhliða jörð. Og hvernig er henni háttað, getur maður verið hér og þar, eða þarf maður að hverfa héðan lífs eða liðinn til að umskapast á nýrri jörð. Hverfur maður kannski héðan og saga manns þurrkast út eins og hefði aldrei verið. Eða skiptist maður upp eins og fruma líkamans, tveir, þrír, fjórir, ótölulegur svermur af mér á ótal tilverusviðum. Er það kannski það sem draumar eru, þegar maður dettur á milli tilverustiga og upplifir sig í öðrum samhliða tilverum........

©Steinart

Takk fyrir.

Gott að sjá að gerlegt er að vernda frelsi okkar með samstilltu átaki þessa ágæta fólks, takk fyrir það.

Birgitta og aðrir aðgerðasinnar lýsa yfir sigri

Vinsældagredda........

Eðlilegt má það vissulega teljast að tímarit notfæri sér hina ýmsu skinhelgi eða allskyns tabú til að selja sem flest eintök, það er bara eðli fyrirtækja, að reyna að tryggja afkomu sína. Og á forsíðu beggja tímarita er komið inn á eitthvað sem að öllu jöfnu liggur undir yfirborðinu, eitthvað sem er ekki alveg viðurkennt eða þykir skrýtið. Í báðum tilvikum eitthvað sem er kannski á jaðri hins kynferðislega, sem sannarlega er enn hálfgert tabú í það minnsta í Bandaríkjunum eins öfugsnúið og það nú er. Hvað á ég við þegar segi í báðum tilvikum séu snertipunktar við hið kynferðislega; í tilfelli hinnar ungu móður er það aðeins það að sér í bert brjóst hennar sem er nú ekki alveg það viðtekna í heimi almennrar tímaritaútgáfu í Bandaríkjunum og ber brjóst mikil hneykslunarhella, enn verið að tala um brjóstið á Janet Jackson sem datt allt í einu fram úr blússunni er hún var að syngja í hálfleik á einhverjum íþróttaviðburði. S.s. ber brjóst, tilvísun í kynferðislegar athafnir. Hvað varðar blessaðan karlinn hann Obama, þá er hann nú fyrir það fyrsta að berjast fyrir endurkjöri til forseta eins og við öll vitum og menn beita öllum ráðum til að vekja á sér athygli, hann hefur sagt svo margt sem fellur vel í kramið hverju sinni, en efndir loforða og eftirbreytni samkvæmt hinum oft góðu hugmyndum kannski aðeins í óljósari kantinum. Þess utan hafa hin ýmsu ríki Bandaríkjanna nú á síðustu vikum og mánuðum verið að draga til baka leyfi samkynhneigðra til að ganga í hjónaband og því getur Obama engu um breytt, hvort sem hann vill eða ekki!

Bitist um lesendur

ORÐ........................

Döpur, kát, lýsandi, óljós, glöð, gröð, gætileg, galsafenginn, glæfraleg, grandvör, góð, vond, værukær, vönduð, veigalítil, mikilfengleg, smá, stór, snarkandi, róandi, litfögur, guggin, litrík, litlaus, lítilfjörleg, lítillækkandi, upphefjandi, stórmannleg, snautleg, skrautleg, skaðleg, uppbyggjandi, það má hafa ótal orð um orð, meira en orð er á gerandi, í orðgnótt gerjast oft hugmynd sem seinna verður okkur orðaveisla. Eða orð í tíma töluð......

©Steinart

Smá P.....

Orð um borð í skáldfarinu á sporbaug um sálu mína í leit að gömlum minnum sem nýtast sem eldsneyti á bál prósans.

----------------------------------------------------------------------

Samtal við spegilinn sem ekki lætur blekkjast af vel fram settum fagurgala með mjúkri sefjandi röddu sagnameistara hinnar tvíræðu orðgnóttar.
-------------------------------------------------

Og það sem á milli er
er oft hið óræða
þetta ósagða
sem þyrfti þó
sannarlega stundum
að vera ljósara.
-------------------------------------

©Steinart

Hver er fréttin!

Enn eitt málið þar sem komið er í veg fyrir "hryðjuverkaárás", sem hugsanlega var leidd fram af mönnum frá Bandarísku leyniþjónustunni sem smyglað höfðu sér í raðir meintra hryðjuverkamanna. Þessi fréttaflutningur er ekki til annars en að ala á hræðslu almennings við þessa oft á tíðum sviðsettu hryðjuverkaógn.

Komu í veg fyrir sprengjutilræði

Skiptir það máli!

Já, það skiptir máli. Þó að við teljum okkur ekki hafa neina vigt í hinu stærra samhengi þá er það samt að mínu áliti ekki gott að allar upplýsingar um mann liggi fyrir til nota fyrir þá sem vilja. Ekki þarf endilega að ganga út frá því að einhverjir vilji nota þær upplýsingar sem við gefum af okkur sjálfviljug til illra verka, en allur er varinn góður. Því bæði eru það stjórnvöld ríkja sem þarna geta safnað upplýsingum um þegna sína og athafnir þeirra eins líka hin ýmsu fyrirtæki sem kaupa sér aðgang að stórum hópi fólks, draumum þeirra og athöfnum, sem geta þá nýst þeim í útfarinni auglýsingamennsku sem beint er að líklegum viðskiptavinum úr hópnum. En skiptir þetta máli, flestir virðast telja það hið besta mál, að persónuupplýsingarnar séu eitthvað sem sé allt í lagi að séu opinberar. Jú, það getur vel verið, engum dettur í hug að fara að nota upplýsingar um â "mig" í skuggalegum tilgangi. Og vel má það vera, við skiptum kannski engu máli, en ættum við ekki að íhuga þetta aðeins. Upplýsingar eru völd, engin ástæða til að gefa þær frá sér án umhugsunar.

Fáir nota öryggistæki á Facebook

Týpísk hjarðmennska...............

Æ, hvað við erum leiðitöm. Hoppum í galsafenginni eftirvængingu í múgsefjunarpyttinn. Leiðitöm þjóð ginnkeypt fyrir hugsanlegum smávinnigum, sem síðar verðum að greiða fyrir rúmlega fullt verð.

Allt fullt hjá Bauhaus

Níutíu og níu loftblöðrur.............

Greinilega er verið að semja við ríki en ekki einstakling hér. En svona er veröldin í dag og menn reyna allar leiðir til að komast kringum reglugerðirnar til að selja landið okkar. Vonandi að þetta verkefni færi velsæld í hérað.

Huang vill samning til 99 ára

Vinnusápublús.............

Fjórir veggir sem halda þér í skefjum
Innmúruð öryggistilfinning
Í vari gegn gengdarlausri ásókn nútímans
Í heimi hins skáldaða, hálf skáldaður sjálfur
Sálartetrið í Freudískri kynferðiskreppu
Búinn að bæla allar tilfinningar svo lengi
Þekkir ekki lengur sannar tilfinningar
Töpuð löngun til frjáls lífs
Kannski aðeins mennskt vinnudýr
Allt hverfist um starfið, framann
En lengstum er ekkert að gerast
Ertu nokkuð að bíða eftir stóra tækifærinu
Veistu að ekkert gerist nema þú viljir það
Verður að draga til þín tækifærin
Eða ertu alveg orðinn samdauna
Útbrunninn, fórnaðir þér kannski fyrir firmað
En firmað nærist aðeins á hagnaði, þér
Sýgur úr þér lífskraftinn, þurkar upp frumleikann
Vakna, borða morgunkornið, keyra til vinnu
Bíða eftir kaffipásunni, leita frétta hjá liðinu
En það var innan sinna fjögurra
Horfandi á hinn sí dáleiðandi skjá, flatskjá
Ó, veistu hvað gerðist svo í draumsápulandi
Æðislegt brillíant fullkomið líf og kokteilar
Skutlast í létta heilsurækt á sportbílnum, með hárið flaksandi
Sólin skín alltaf, og nóg af seðlum og sætindum
En kaffið lífgar eitt augnablik
Vinnur þitt verk í vélrænum takti, engin fersk hugsun bærist
Brátt kemur helgi á ný með fullt af tækifærum
Innan fjögurra veggja, umfaðmandi sjónvarpsheiminn
Og allt gerist svo hratt, helgin á enda
Já enn ein helgin með úttroðna laugardagsnammipoka
Vakna, borða morgunkornið, keyra til vinnu...........................

©Steinart