draumaveröld hugans............

Draumar í aðdraganda nýrrar tilveru. Rúmrusk, tíðar ferðir til að losa úr blöðrunni, teið skilar sér. Tíminn líður í nóttinni, en morguninn of skammt undan, einn draumur tekur við af öðrum, stef með leikendum úr hversdeginum. Kristallar klingja í stóískum friði utan seilingar, er hinn jarðneski kraftur sytrar um herbergið. Jarðtengingar, ástar og friðarkraftur, örvun hinnar sönnu skynjunar. Og Buddha læðist um sviðið, telur perlur á bænafesti, rekelsisilmur höfugur auðveldar huganum að sigla loftvegi hins mögulega eða stingast í upphafið, á bólakaf í haf óreiðunnar, sökkva til botns í visku liðinna lífa en að lokum stingast upp á yfirborðið eins og Háhyrningur í leik og falla með gusum svo vel verði eftir tekið. Og leitin að hjörðinni, eigin hópi heldur áfram á öldum alnetsins, fletti mörgum lögum af síðum sem síður en svo eru upplífgandi né gefandi í leiðbeinandi betri siðum. En að lokum berast böndin heim í hérað, hvar allt byrjaði á sinn lítilmótlega og saklausa hátt með örlítilli hugmynd um dreymandans skýru mynd af draumaveröld hugans........

 

©Steinart 

 

sannleikur hins algera............

Í djúpri hugsun rennur

sannleikur hins algera.

Í straumi hins liðna

endurskapast minningarnar.

Í lífsins þraut og gleði

upplifum við það sem við þurfum.

 

©Steinart